ٹھٹہ: تباہی اور بربادی پھیلاتا سپر فلڈ زیریں سندھ سے گزر رہا ہے۔ کوٹری بیراج پر پونے نو لاکھ کیوسک کا ریلا، منارکی اور سورجانی بند پر دباوٴ، سجاول اور نواحی علاقوں میں سخت خوف و ہراس پھیل گیا ہے۔کوٹری بیراج پر انتہائی اونچے درجے کا سیلاب ہے۔ لاڑکانہ میں عاقل لوپ بند کے قریب کٹاوٴ شروع ہوگیا۔ہنگامی صورتحال کے پیش نظر فوج تعینات کر دی گئی۔ ٹھٹہ کے پندرہ دیہات زیر آب آگئے۔گیسٹرو اور حادثات میں چھ بچے جاں بحق ہو گئے۔

کوٹری بیراج پر دریائے سندھ میں پانی کی آمد آٹھ لاکھ تہتر ہزار کیوسک سے بڑھ گئی ہے اور انتہائی اونچے درجے کا سیلاب برقرار ہے۔ ڈاوٴن اسٹریم میں سات لاکھ تیس ہزار کیوسک پانی چھوڑا جا رہا ہے۔ ٹھٹہ میں رات بھر طوفانی بارش اور دریائے سندھ کی تیز لہروں کے باعث سورجانی، منارکی اور سونڈا بند پر سخت دباوٴ بڑھ گیا ہے۔ سجاول اور نواحی علاقوں میں سخت خوف پایا جاتا ہے۔ علاقہ مکینوں نے نقل مکانی شروع کردی ہے۔

سمندر کی اونچی لہروں اور سطح بلند ہونے کی وجہ سے دریائے سندھ کا ریلا سمندر میں گر نہیں رہا۔ پانی گھوڑا باری کے قریب کوٹری الچھ رکھیو شاہ میں داخل ہوگیا۔ جس سے خانو وسایو، آچر کلمتی، سمیت پندرہ سے زائد دیہات زیر آب آگئے۔ پانی میں پھنسے گیارہ سو افراد کو محفوظ مقامات پر منتقل کیا گیا ہے۔ دیگر محصورین کو نکالنے کیلئے ریسکیو آپریشن جاری ہے۔ حیدرآباد میں بھی کچے کے علاقے زیر آب آگئے ہیں اور مکانات پانی میں ڈوبے ہوئے ہیں۔

لطیف آباد نمبر دس کے بچاوٴ بند سے ملحقہ گلستان سرمت جانے والی شاہراہ کا ایک حصہ زیر آب آگیا۔ حسین آباد بند سے ملحقہ مہران پارک بھی پانی میں ڈوبا ہوا ہے۔ کشمور کے ریلیف کیمپوں میں صحت کی سہولتوں کا فقدان ہے۔ گیسٹرو سے آج مزید چار بچے جان کی بازی ہار گئے، ضلع بھر میں ہلاکتوں کی تعداد تیس ہوگئی ہے۔ گھوٹکی کے علاقے موچکو میں پانی میں ڈوب کر دو بچے جاں بحق ہوئے۔

دوسری جانب لاڑکانہ اور قریبی علاقوں میں دریائے سندھ کے حفاظتی پشتوں پر دباوٴ اب بھی برقرار ہے۔ کئی مقامات پر بندوں سے رساوٴ جاری ہے۔ سیلاب کچے کے علاقوں کی طرف بڑھنا شروع ہوگیا۔ پنو عاقل سے لے کر لاڑکانہ خیرپور پل، شیری، جونیجو اور گاڑی ڈیر کے حفاظتی پشتوں میں دراڑیں پڑنے کے باعث پانی رس رہا ہے۔

سیلاب سے منڑی غلام شاہ، فتح پور، فتح محمد اعوان، ڈیری، فرید آباد، گاجی ڈیرو کے علاقوں میں پانی داخل ہوگیا۔ علاقے میں موجود دس ہزار افراد محفوظ مقامات کی جانب منتقل ہو رہے ہیں۔ لاڑکانہ میں نئی خیمہ بستی قائم کی جا رہی ہے۔ ریلیف کیمپ میں جڑواں بہن بھائی سمیت تین بچوں کی پیدائش سے بے گھر والدین میں خوشی کی لہر دوڑ گئی۔ ایک بچے کا نام پردیسی دریا اور جڑواں بچوں کے نام بے نظیر اور بلاول رکھے گئے ہیں۔

لاہور : دریائے راوی کے معاون نالوں میں پانی کا بہاؤ بڑھ گیاجبکہ ڈی سی او لاہور کا کہنا ہے کہ دریائے راوی میں سیلاب کا کوئی خطرہ نہیں ہے۔دریائے راوی کے معاون نالوں میں شدید بارش کے باعث پانی کا بہاؤ بڑھ گیا ہے،فلڈ وارننگ سنٹر کے مطابق شاہدرہ کے مقام پر نچلے درجے کا سیلاب ہے،راوی سائفن پر پانی کی سطح ڈیڑھ ہزار کیوسک کی کمی سے انتالیس ہزار کیوسک رہ گئی ہے۔ڈی سی او لاہور سجاد احمد بھٹہ نے بابو صابو انٹر چینج کا دورہ کرتے ہوئے کہا ہے کہ دریائے راوی میں سیلاب سے نمٹنے کیلئے حفاظتی انتظامات مکمل کر لئے گئے ہیں۔

اسلام آباد: میاں نواز شریف کی زیر صدارت مسلم لیگ ن کی ریلیف کمیٹی کا اجلاس اسلام آباد میں جاری ہے۔اجلاس میں ریلیف کمیٹی متاثرین کی فوری امداد کی حکمت عملی تیار کرے گی۔

اسلام آباد: مسلم لیگ ن کے رہنما احسن اقبال نے کہا ہے کہ مارشل لاء کا سب سے بڑا نقصان وفاق کو ہوگا۔اسلام آباد میں میڈیا سے بات چیت کرتے ہوئے احسن اقبال نے کہا کہ متحدہ قومی موومنٹ کے قائد الطاف حسین کا بیان کیس بھی سیاسی کارکن کے لئے حیران کن ہے۔ان کاکہنا تھا کہ پاکستان صرف جمہوری اداروں کی مضبوطی سے ترقی کرسکتا ہے۔انہوں نے کہا کہ مارشل لاء کا نفاذ ملک توڑنے کے مترادف ہوگا۔احسن اقبال نے کہا کہ مارشل لاء کے دور میں جاگیرداروں،وڈیروں کو آگے لگایا گیا۔

شہدادکوٹ: ضلعی حکومت نے شہداد کوٹ کے رہائشیوں کو علاقے خالی کرنے کیلئے آخری وارننگ جاری کردی۔ صوبائی وزیر خوراک نادر مگسی کے مطابق پانی کی سطح آٹھ فٹ سے بلند ہوگئی۔ پشتوں کی اونچائی کم ہے۔ ریلے سے قبو سعید خان کو خطرہ ہے۔ سیلاب نے سندھ میں بھی تباہی مچائی اور کئی اضلاع زیر آب آگئے۔تمام تر اقدامات کے باوجود شہداد کوٹ کا وسیع رقبہ پانی میں ڈوبا ہوا ہے۔ جان بچانے کیلئے لوگوں سے جو بن پا رہا ہے کر رہے ہیں۔ ہر کوئی جان بچانے کی تگ و دو میں مصروف ہے۔ چاروں طرف پانی ہی پانی ہے۔ میں یہاں سے روزگار کماتا ہوں۔ اپنا شہر چھوڑ کر نہیں جا سکتا۔ یہاں جیتا ہوں یہیں مروں گا۔

حالات مشکل سہی لیکن امید نہیں ٹوٹی۔ جیسے ہی موقع ملتا ہے معمولات زندگی بحال ہونے لگتے ہیں۔لوگوں کو پینے کا ٹھنڈا پانی دستیاب نہیں۔ اسی لئے میں نے برف کا ڈپو کھولا ہے۔ میرا مقصد فوج، پیرا ملٹری اور پولیس کو ٹھنڈا پانی فراہم کرنا ہے۔ٹھٹہ کا علاقہ سجاول بھی سیلاب کی بے رحم موجوں کا نشانہ بنا۔ کچے کے علاقے کے مکین گھر بار چھوڑنے پر مجبور ہوئے۔ سب کچھ چھوڑ دیا لیکن حکومتی امداد نہ ملی۔ حکومت نے کہا کہ سیلاب سب بہا لے جائے گا۔ ہم نے گھر چھوڑ دیا۔ آٹھ دس دن ہوگئے لیکن امداد نہیں ملی۔ سیلاب کی تباہ کاری سے انکار نہیں۔ لیکن لوگوں کا جذبہ بحالی بھی قابل تحسین ہے۔

سیالکوٹ: سیالکوٹ میں کرکٹ کے جھگڑے سے چلنے والی مخالفت کے نتیجے میں وحشیانہ تشدد سے ہلاک ہونے والے بھائیوں کے اہل خانہ کا کہنا ہے کہ بعض راہگیروں نے ظالموں کا ہاتھ روکنے کی کوشش کی، لیکن پولیس نے ایسا نہ ہونے دیا۔شہر کی مصروف شاہراہ پر ہولناک تشدد سے قتل ہونے والے بھائیوں منیب اور مغیث کے چچا کا کہنا ہے کہ ان کے بھتیجوں کا ملزمان سے کرکٹ پر جھگڑا ہوا، جس پر ملزمان نے انہیں گراؤنڈ میں کھیلنے سے منع کیا، لیکن وہ وقوعہ کے روز بھی کھیلنے چلے گئے۔

منیب اور مغیث کے والد کا کہنا ہے کہ انہیں اور ان کے بیٹوں کی روحوں کو سکون تب ہی ملے گا جب ملزموں کو بھی اسی چوک میں سزادی جائے۔مقتولین کی والدہ کا کہنا ہے کہ اس کے بچوں کے قاتلوں کو سزا نہ ملی تو وہ روز محشر اس کا حساب لے گی۔مرنے والے بھائیوں کے عزیز و اقارب کا کہنا ہے کہ پولیس مارنے والوں کو تحفظ دے رہی تھی اور ملزموں کو ظلم سے منع کرنے والوں کو روک رہی تھی۔

منیب اور مغیث کے اہل محلہ کا کہنا ہے کہ دونوں بھائی نیک تھے، اور انہیں کبھی کسی منفی سرگرمی میں حصہ لیتے نہیں دیکھا۔لوگوں کا کہنا ہے کہ ملزموں کو ایسی عبرتناک سزادی جائے کہ آئندہ کوئی ظالم والدین سے ان کے لخت جگر چھیننے کی جرات نہ کر سکے۔

وانا: جنوبی وزیرستان میں خودکش حملے میں سابق رکن اسمبلی مولانا نور محمد سمیت پندرہ افراد شہید ہوگئے۔وانا میں مولانا نور محمد کے مدرسے میں نماز ظہر کے بعد خودکش حملہ ہوا۔ عینی شاہدین کے مطابق دارالعلوم میں پچہتر سے سو افراد موجود تھے۔ اسی سالہ مولانا نور محمد اتحاد علماء قبائل کے سربراہ تھے وہ جے یو آئی سے بھی وابستہ رہے لیکن بعد میں نظریاتی اختلافات پر لاتعلقی اختیار کرلی۔

مولانا نور محمد نے کئی مواقع پر انتظامیہ اور قبائل کے درمیان ثالث کا کردار ادا کیا۔ مولانا نور محمد اور دیگر شہداء کی نماز جنازہ میں لوگوں کی بڑی تعداد نے شرکت کی۔

لاڑکانہ: سابق ناظم کراچی نعمت اللہ خان نے کہا ہے کہ پاکستان میں آج تک تمام حکومتوں نے لوٹ مار کے سوا کوئی کام نہیں کیا۔ اسلام کے نام پر قائم ہونے والے ملک پر آج کوئی اعتماد کرنے کو تیار نہیں۔لاڑکانہ پریس کلب میں پریس کانفرنس کرتے ہوئے نعمت اللہ خان نے کہا کہ عالمی برادری سیلاب متاثرین کی مدد کے لیے اربوں ڈالر حکومت کو دے رہی ہے لیکن حکومت سیلاب متاثرین پر خرچ نہیں کررہی۔

انہوں نے کہا کہ سیلاب متاثرین کے لیے ناقص انتظامات سے ان کی تذلیل ہورہی ہے جو قابل مذمت ہے۔ بدترین سیلاب اللہ کی ناراضی کا ثبوت ہے۔ ہمیں توبہ استغفار کرنی چاہیے۔ انہوں نے مطالبہ کیا کہ ٹوڑی بند حفاظتی بند میں پڑنے والے شگاف کی غیر جانبدارانہ تحقیقات کرائی جائیں۔

اسلام آباد: ایم کیو ایم کے وفاقی وزیر بابرغوری نے کہا ہے کہ الطاف حسین نے مارشل لاء کی حمایت نہیں کی۔ حکومتیں بدلتیں رہیں گی، عوام کی تقدیر نہیں بدلیگی۔ بابر غوری نے کہا کہ موجودہ سسٹم فیل ہو گیا ہے وڈیرانہ سسٹم اور جاگیردارانہ سسٹم سے چھٹکارا حاصل کرنا ہوگا۔

ان کا کہنا تھا کہ الطاف حسین نے ملک کے موجودہ مسائل کے حل کے لیے تجویز پیش کی۔ انہوں نے کہا کہ ایم کیو ایم نہیں ایم ایم اے خود مارشل لاء کی پیداوار تھی۔ امریکا کو خوش کے لئے کام کرنے والے محب وطن نہیں ہوسکتے۔

مسلم لیگ کے رہنما خواجہ آصف نے کہا کہ ایم کیو ایم نے سب سے بڑے فیوڈل مائنڈ کو اپنایا ہوا ہے۔ تبدیلی اقتدار میں رہ کر ممکن نہیں،ایم کیو ایم کو تضاد کو دور کرنا چاہیے۔ اور حکومت سے باہر آنا چاہیے۔

اسلام آباد: سپریم کورٹ میں اٹھارویں ترمیم کے خلاف درخواستوں کی سماعت کے دوران ایڈووکیٹ جنرل پنجاب نے ججز تقرر کے نئے طریقہ کار کی مخالفت کر دی،چیف جسٹس نے کہا ہے کہ عدلیہ کی خود مختاری ریاست کا اہم عنصر ہے جس سے انکار نہیں کیا جا سکتا۔سترہ رکنی بنچ کے روبرو دلائل میں ایڈووکیٹ جنرل پنجاب خواجہ حارث نے کہا کہ ججز تقرر کے نئے طریقہ کار سے عدلیہ کی آزادی ختم ہو گئی۔ پارلیمانی کمیٹی سے جوڈیشل کمیشن کو غیر موٴثر بنا دیا گیا ہے۔ وزیر قانون اور اٹارنی جنرل کی جوڈیشل کمیشن میں شمولیت عدلیہ میں انتظامیہ کی مداخلت ہے۔ یہ اقدام آرٹیکل ایک سو پچہتر کی شق تین کے منافی ہے۔

انہوں نے کہا کہ عدالتی کمیشن اور پارلیمانی کمیٹی دونوں عدلیہ کی خود مختاری کے خلاف ہیں،،جسٹس جواد ایس خواجہ نے ریمارکس دیئے کہ ججوں کا تقرر آٹھ ارکان پارلیمنٹ پر چھوڑنا خطرناک ہو سکتا ہے۔ جسٹس جاوید اقبال نے کہا کہ پارلیمنٹ کی دانشمندی کا فیصلہ کسی عدالت میں نہیں کیا جا سکتا،جسٹس ثاقب نثار نے خواجہ حارث سے استفسار کیا کہ کیا آرٹیکل ایک سو پچہتر اے کو کالعدم قرار دینے سے آرٹیکل ایک سو ستتر دوبارہ بحال ہو جائے گا اور کیا آپ اس کے حق میں ہیں؟۔

جسٹس تصدق حسین جیلانی نے کہا کہ فرض کریں آرٹیکل ایک سو پچہتر اے کالعدم قرار دینے سے آرٹیکل ایک سو پچہتر دوبارہ بحال ہو جائے گا تو ایڈووکیٹ جنرل نے تسلیم کیا کہ یہ متبادل قانون ہے ،چیف جسٹس نے اٹارنی جنرل مولوی انوار الحق کو منگل سے اپنے دلائل کا آغاز کرنے کی ہدایت کرتے ہوئے سماعت ملتوی کر دی۔